როგორ ვუწყობთ ხელს წრიული ფოლადის მასობრივ ბაზარზე დამკვიდრებას

ფოლადი ჩვენთვის უმნიშვნელოვანესი მასალაა – ის განსაზღვრავს ჩვენი ავტომობილების უსაფრთხოების, სიმტკიცისა და გამძლეობის საფუძველს. და ჩვენ შორს ვართ იმ აზრისგან, რომ ერთადერთი კომპანია ვართ, რომელიც ფოლადს ამ თვისებების გამო აფასებს.

ეს მსოფლიოში ერთ-ერთი ყველაზე ფართოდ გამოყენებადი მასალაა, თუმცა, ამავდროულად, ფოლადის წარმოება დიდ ენერგორესურსებს მოითხოვს და ტრადიციულად მნიშვნელოვანი წვლილი შეაქვს გლობალურ ინდუსტრიულ ნახშირბადის გამონაბოლქვში. ამიტომ, ამ გარემოსდაცვითი კვალის შემცირება — იმის უზრუნველყოფით, რომ ფოლადი კვლავ აკმაყოფილებდეს ხარისხისა და ეფექტურობის მაღალ სტანდარტებს — უმნიშვნელოვანეს გამოწვევას წარმოადგენს.

სწორედ ეს გამოწვევა გახდა საწყისი წერტილი CiSMA-სთვის, რაც ნიშნავს „წრიულ ფოლადს მასობრივი ბაზრისთვის“ (Circular Steel for Mass Market Applications). ეს არის ევროპული კვლევითი და ინოვაციური პროექტი, რომლის მიზანიც მეორადი ჯართიდან მაღალი ხარისხის ფოლადის წარმოების დანერგვაა, რათა ის მასობრივად იქნას გამოყენებული სხვადასხვა ინდუსტრიაში.

პროექტი აერთიანებს ფოლადის მწარმოებლებს, ქარხნებს, კვლევით ინსტიტუტებსა და ტექნოლოგიების სპეციალისტებს მთელი ევროპიდან, და ჩვენ ამ პროცესში ჩართული ერთ-ერთი ინდუსტრიული პარტნიორი ვართ. ეს კოლაბორაციული მიდგომა უზრუნველყოფს იმას, რომ მეორადი ფოლადის წარმოების თითოეული ეტაპი — ჯართის სორტირებიდან და ფოლადის დამუშავებიდან დაწყებული, მისი რეალურ წარმოებაში გამოყენებით დასრულებული — შესაბამისი ექსპერტიზით წარიმართოს.

ფოლადის წარმოების პროცესის ხელახალი გააზრება

მთლიანად ჯართისგან მაღალი ეფექტურობის ფოლადის წარმოება მარტივი არ არის. მეორადი ფოლადი შეიძლება შეიცავდეს წინა გამოყენებიდან დარჩენილ ელემენტებს, რამაც შესაძლოა გავლენა მოახდინოს მასალის თვისებებზე მისი ფორმირებისა და შეერთების (შედუღების) პროცესში. სწორედ ეს ზღუდავდა ტრადიციულად სრულად გადამუშავებული ფოლადის გამოყენებას ისეთ მასობრივ პროდუქტებში, როგორიც ავტომობილებია.

CiSMA ამ პრობლემას ელექტრორკალური ღუმელების (EAF) ტექნოლოგიაზე ფოკუსირებით წყვეტს. ეს მიდგომა შესაძლებელს ხდის ფოლადის წარმოებას მთლიანად გადამუშავებული ჯართისგან და შეუძლია CO₂-ის გამონაბოლქვი 75 პროცენტით შეამციროს, ტრადიციულ პროცესებთან შედარებით. გარდა ამისა, პროექტის ფარგლებში იქმნება ჯართის დახარისხების, მასალის ანალიზისა და ტესტირების გაუმჯობესებული მეთოდები, რათა გადამუშავებულმა ფოლადმა მკაცრი ინდუსტრიული მოთხოვნები დააკმაყოფილოს.

რაც ყველაზე მნიშვნელოვანია, ეს სამუშაო სცდება მასალის უბრალო განვითარებას: CiSMA მიზნად ისახავს დაამტკიცოს, რომ წრიული ფოლადის გადაწყვეტილებებს შეუძლია სამრეწველო მასშტაბით, რეალურ საწარმოო სისტემებში მუშაობა.

რატომ არის მნიშვნელოვანი ჩვენთვის

ჩვენს საწარმოო პროცესში CO₂-ის გამონაბოლქვის ერთ-ერთი უდიდესი წყარო სწორედ ავტომობილების დასამზადებლად გამოყენებული ფოლადია — მასზე მოდის ახალი Volvo-ს მასალებთან დაკავშირებული ყველა გამონაბოლქვის საშუალოდ 25 პროცენტი. ჩვენი მიზანია, 2040 წლისთვის სათბური აირების ნეტო-ნულოვან (net-zero) მაჩვენებელს მივაღწიოთ, ხოლო ფოლადის წარმოებიდან მიღებული გამონაბოლქვის შემცირება ამ მიზნის მიღწევაში მნიშვნელოვნად დაგვეხმარება.

Volvo Cars პროექტის ორი საპილოტე საწარმოო სივრციდან ერთ-ერთია, სადაც 100%-ით გადამუშავებული ფოლადის თვისებებს ავტომობილის სხვადასხვა დეტალში ვტესტავთ. ეს პროცესი საშუალებას გვაძლევს დავრწმუნდეთ, რომ წრიული ფოლადი ჩვენს მკაცრ ხარისხისა და გამძლეობის სტანდარტებს პასუხობს, შევისწავლოთ მისი თავსებადობა საწარმოო ხაზებთან და ნათლად დავინახოთ ეკოლოგიური უპირატესობა ტრადიციულ კომპონენტებთან შედარებით.

ჩვენი კლიმატური სამოქმედო გეგმა ყოვლისმომცველი და ერთ-ერთი ყველაზე ამბიციურია ავტოინდუსტრიაში. ამ გეგმის ფარგლებში, ჩვენი მიზანია, რომ 2030 წლისთვის ჩვენს ავტოპარკში გამოყენებული მასალების საშუალოდ 30% გადამუშავებული იყოს, ხოლო 2030 წლიდან გამოშვებული ახალი მოდელები სულ მცირე 35% გადამუშავებულ ან ბიოლოგიურ საფუძველზე დამზადებულ მასალებს შეიცავდეს. CiSMA პროექტი შესანიშნავი შესაძლებლობაა ჩვენთვის, რათა შევამციროთ ჩვენი საერთო კლიმატური გავლენა და, ამავდროულად, მხარი დავუჭიროთ ფოლადის შესყიდვის მიმართ უფრო წრიულ მიდგომას.

თუ გსურთ მეტი გაიგოთ გადამუშავებულ მასალებთან დაკავშირებულ ჩვენს საქმიანობაზე, შორს წასვლა არ დაგჭირდებათ — შეხედეთ ჩვენს ახალ, ელექტრო SUV-ს EX60 electric, რომელიც ახალ სტანდარტებს აწესებს გადამუშავებული და დაბალნახშირბადიანი მასალების გამოყენებაში. იგი შეიცავს ყველაზე დიდი რაოდენობით გადამუშავებულ მასალას ნებისმიერ სხვა ელექტრო Volvo-სთან შედარებით, რაც კი ოდესმე შეგვიქმნია — მათ შორის 49% გადამუშავებულ ალუმინს და სპეციალურ ფოლადს, რომელიც წარმოებულია ფოლადის დნობის პროცესში პრაქტიკულად ნულოვანი ნახშირბადის გამონაბოლქვით.

CiSMA (Circular Steel for Mass Market Applications) ფინანსდება ევროკავშირის მიერ, Horizon Europe პროგრამის ფარგლებში (პროექტის ნომერი: 101177798).